Il cjamp di concentrament di Visc: une storie dismenteade.
Visc, in provincje di Udin, un comun minim, jentri i ultims in Italie pe superficje, dal 2001 in ca al è cjapât sot cu la maniere di valorizâ lis casermis dismitudis. Problem cun aspiets vergelâts ancje in altrò.
Areis enormis, in degradazion imburide, ancjemò in man al demani o, des voltis di proprietât comunâl, a spietin di sedi stramudadis in ûs civii.
Se lis particolaritâts a son costantis in une situazion pûr condividude, culì sù par jù 120.000 metris cuadris di superficie a son a cjaval di chel che par secui al fo un cunfin e a tegnin dentri scuasi intate inte conformazion urbanistiche e architetoniche, un cjamp di concentrament che il fassesin al parecjà par int fate presonire in Jugoslavie (fevrâr- setembar 1943).
Cualchi dì in daûr, il nestri Ministri dal forest, e il so coleghe todesc (a jerin intal 2008 n.d.A.) a son lâts in visite a la risiere di San Sabba, a Triest e si son esprimûts cun peraulis nobilis. Ma pai cjamps di concentrament fassiscj e je diferente: cuntune inmagjn retoriche, baroche, ma eficacje, si podares dî che ancjemò si à miôr scovâ, sote dal tapêt dal timp, lis scovadicis de storie.
E alore la difese de memorie e devente un imperatîf morâl che al va al di là dât locâl.
Culì a son sîs secui di storie, uniche, incomparabile, inacessibile in altrò, scuasi incrodibile inte realtât; o vin di fâ in mût che no nus scjampi par ignoranze volude, cjaviestre, preocupade di sapulî in maniere colpevule; di manipulâ la storie par dispensâsi di esams, confronts; di fâ casse, intal micro ambient dal locâl, lontan di une oportunitât culturâl, che la sô impuartance e va di là dal lûc, de regjon, dal Stât.
Di cualsisei bande che si cjapilu, parfin di un mût di viodi ideologjc, duncje prevignût, chest spazi di tiere di pôcs centenârs di metris lineârs (lis casermis di cumò e, prime il cjamp di concentrament), al spalanche un mont devant di sé.
Bisugne dialogâ cun lui, sedinò al devente un sempliç centenâr di metris di tiere, cun plui o mancul jerbe, superbeose de sô capacitât di ocupâ spazis, ignare di vê compagnât dramatichementri destins umans..
Cunfin; culì la peraule e je risunade secui dilung.
Perfin un diu, i Romans, a vevin disturbât par lui, il diu Tiermin.
I Romans, deventâts ostaçs di une mentalitât nazionalistiche esplodude intai nestris agns, daspò di vê clucît intal Votcent, “primevere dai popui”, o semplicementri disastri scorsenât di une superioritât fûr di reson, che e pratindeve il “jo sì, ma tu no!”
No “cunfin bon”, sicu che al indicave il poete furlan Celso Macor, mai locâl, e in sinergje cui paîs vicinants, ma chel spazi ruspiôs, interogant, di suponent superioritât, che, par prin, al domandave cont ai popui dai lôr rapuarts, dal lôr vivi insiemit.
Chest inciuntri cui letôrs al vongole su di une lizerece ideologjche (no superficialitât), che, se ben vivude, e podares puartâ a capî lis resons di chei altris, parcè che il cunfin al sustanzializave cognossince, storie personâl, che, cui agns, e deventave sociâl.
Cuant che cunfin al fo (principi dal XVI secul) culì di nô, jenfri Vignesie a bonât e la Contee di Gurize a jevât, al jere l’ incuintri dal mont venit-latin, cun chel sclâf, todesc, ongjarês.
Il cunfin al produseve relazions positivis: art, piçul cumierç; e negativis, come il cuintribant, il banditesin, che al sflurive inte mancjance di organizazion moderne dai stâts, e lis scjassadis di scuintri saborâts dai potents, in dai moments particolârs (disconfinaments, razìis di besteam, litighis par dazis, ritîr di impuestis…).
La situazion vongolante intal periodi napoleonic (1797-1815); par un Te Deum falât, l’Arc. di Udin Baldassarre Rasponi al riscjà la fusilazion (il baron plevan di Gardiscje Sigfrido Baselli alore al tajà cui Te Deum)) no gambià cu la vuere dal 1866 e la fissazion dai cunfins jentri il Ream d’Italie e l’impêr di Austrie.
E gambià dome, ufizialmentri, intal 1920, cu l’anession di chestis tieris a l’Italie.
Jenfri chescj doi pôi cronologjcs, il timp intal mieç al à viodudis di ducj i colôrs: la fondazion de magnifiche citât-fuartece di Palme (1593), che e vè l’efiet di un furmiâr pestât, disvuedant progressivementri la impuartance di Gardiscje.
Cunfin mobil, licuit, in Ete napoleoniche, al ricjapà stabilitât daspò dal Congres di Viene (1815), tantche separazion jenfri il Ream dal Iliric a jevât, e il Lombart-Venit a bonât, simpri tal interni dal Impêr austriac (austroungaric dal 1867).
Il 1915 al viôt la ocupazion italiane e il spazi des casermis di cumò di Visc al è destinât a un ospedâl intun prin moment fat di tendis..
Cjaurêt intal 1917 e al nas il Borg Plâf, il cjamp di 400 sfolâts di là (chei de rive çampe de Plâf che a verin i paîs sdrumâts parvie che a jerin sul gnûf front) scuamâts di là de linee dal front.
Intal daspòvuere depuesit di artilierie; intal 1941 caserme cun reparts di mascalcje a supuart de cavalerie che e operave in Jugoslavie assaltade de Italie il 6 di avrîl 1941.
Cjamp di concentrament di fevrâr a setembar dal 1943, cun spazis grandonons ben plui di chei di cumò (120.000 metris cuadris sù par jù).
Al faseve part di une operazion mate di snazionalizâ la Slovenia, par esempli (ma a jerin internâts serps, crauats, bosgnacs, montenigrins…) cun cjamps a Gurize, Sdraussine (Go), Fossalon (Go), Gonârs (Ud), Monigo (Tv), Bosco Chiesanuova (PD)…
Depuesit de Wehrmacht intal 1944, une trentine di partigjans dal GAP Basse furlane sot dal comant di Ilario Tonelli (Martello), cuntune azardose operazion di commando e puarte vie un camion cun sprolungje plen di armis.
Chel che i rimet al è dome il cjan-lôf dal maressial comandant; al veve non Rolf e al jere tirât sù par atacâ cui che al veve cun sé armis.
Intal 1945 culì i inglês a disarmin 15.000-20.000 Cetnics.
Daspò de vuere, la caserme e je intitulade a Luis Sbaiz, medaie d’aur combatint cu l’esercit dai aleâts che a tornavin sù pe Italie.
Intal 1947 e da acet a finanzîrs e garbenîrs che a van a ricjapâ posession di Gurize.
Daspò e sarà caserme, cuntun mâr (miârs) di zovins di dute Italie a fâ la naie, fintromai al 1996, cuant che e siere, par sedi puartade in dote al comun di Visc intal 2001.
Une volte dit dut chest, no si pues no sustignî che dut ce cha al reste dal cjamp, che la caserme e je une piçule part, al à di sedi salvât, salvât soredut progietant, e al à di sei leât cul progjet dal “Museu dal Cunfin”, ideât de bande di chel che al scrîf chestis riis, intal biel edifizi de ex dogane austriache e cundividût di tancj inteletuâi (un par ducj, Boris Pahor) e citadins; un museu dinamic, no un misturot di robe vecje, un lûc di studi, di dibatit, di analisi di situazion, che e pues lâ dai ritais di Europe che a zirarin di chestis bandis, par esempli ai timps de vuere di Gardiscje (1615-1617), di chê cul prefis Mittel, a chê balcaniche, scandinave, fin a chê mediteranee.
Analisi di ce maniere che il cunfin al fos un puest di sgambi economic, culturâl (culì e jere une des dôs doganis teresianis); culturâl intal sens plui larc dal tiermin, in ducj i siei aspiets, de chê de mentalitât, alis arts, al aspiet politic-istituzionâl, a la analisi di altris cunfins, comprindûts chei de anime che a tornin a imbraçâ a la maniere dal sarpint i cûrs dai talians.
Scuasi scuasi, in plui di lâ in devant intal studi di dut chest, il lûc al dovares inventâ, cul studi e l’analisi de bande dai esperts, une schirie di ocasions par tornâ a viazâ la storie devent-daûr, no une operazion fantastiche sul tip di machigne dal timp, ma di rigôr culturâl par tornâ a imparonâsi des miôr cualitâts umanis soredut di chês centradis sul incuintri.
Ferruccio Tassin
(traduzion dal talian di Laurino Nardin)